கடந்த ஆண்டு, நாட்டில் திரவ பால் உற்பத்தியை அதிகரிக்கும் வகையில், 4,000க்கும் மேற்பட்ட கறவை மாடுகளை இறக்குமதி செய்ய தேவையான ஏற்பாடுகள் மேற்கொள்ளப்பட்டு வந்த நிலையில் முதலீட்டாளர்களுக்கு மேய்ச்சல் நிலம் ஒதுக்கீடு செய்வதில் ஏற்பட்ட சிக்கல் மற்றும் மாநில அமைச்சர் பதவிகள் மாற்றம் போன்ற காரணங்களால் கறவை மாடுகளின் இறக்குமதி கடந்த ஆண்டு நடைபெறவில்லை என கால்நடை அபிவிருத்தி அமைச்சகத்தின் அதிகாரி ஒருவர் தெரிவித்துள்ளார்.
எனவே இது தொடர்பாக அடுத்த சில வாரங்களில் சம்பந்தப்பட்ட தரப்பினருடன் மீண்டும் கலந்துரையாடுவதற்கு இராஜாங்க அமைச்சு திட்டமிட்டுள்ளதுடன் குறித்த கலந்துரையாடல்கள் மூலம் எதிர்வரும் மாதங்களில் கறவை மாடுகளை இறக்குமதி செய்ய முடியும் என அவர் தெரிவித்துள்ளார்.
2021 இன் பிற்பகுதியில், நாட்டில் திரவ பால் உற்பத்தியை அதிகரிக்கும் நோக்கத்துடன் ஐந்து தனியார் நிறுவனங்கள் மூலம் 4,200 கறவை மாடுகளை இறக்குமதி செய்ய அமைச்சரவை ஒப்புதல் அளித்தது. மேலும், ஜனதா தோட்டங்கள் அபிவிருத்திச் சபை மற்றும் தேசிய கால்நடை அபிவிருத்திச் சபைக்கு சொந்தமான 2,771 ஏக்கர் கைவிடப்பட்ட காணிகளை பால் பண்ணைகளை பராமரிப்பதற்காக மேற்படி நிறுவனங்களுக்கு வழங்குவதற்கு அனுமதி வழங்கப்பட்டுள்ளது.
